بدور في الشوارع
بدور في العيون
على حاجة فيها حاجة مني
بدور على طعم البيوت
على لحظة دفا في حضن لمة وعيلة
في فول سوداني سخن ولا صحن بليلة
في دفاية في برد الشتا وكوباية شاي
ندفي بيها إيدينا
على خفير درك يحرس بلد بنبوت
بدور على أحلى حاجة فينا
على طعم الدفا في البيوت
على كوز بطاطا ملهلب
وشلة من الجدعان
قرفة بحلبيب تتقلب
في حلم كل جعان
في منقد خشب لفقير
ينام بوش الرضا
من غير عشا من غير سرير
بدور على صاحب بيتصاحب
لا غني ولا وزير
لكن بقلب حرير
يدفي في ليل صاخب
على حمص شام على الكورنيش
وأكلة دُقة بنص رغيف
وحلم يادوب بقد نحيف
بيغزو الكون شريف وعفيف
في خوص القصب.. في كوخ في الريف
وليل في عز الشتا تلاقيه
وسط البيوت
أدفا من شمس الصيف
بقولها وكلي أمل وكُلي حنية
وبسأل أيه العمل يا صُحبة حواليه
بدُور وأدَور على الي مش في إيديه
على لمتنا سوى في بلدنا الندية
لا هي شيوعية ولا علمانية ولا سُنية
دي بلد المسلمة فيها شقيقتها قبطية
طعم البيوت ساكن حيطانها حواليه
بحبها شابة وعجوزة محنية
وأموت لجل ضعفها
واموت لجل تبقى عفية وقوية
طعم البيوت بينا بيغني في عنيه
بيقول لكل البشر في الحلم أغنيه
مايقدر يغنيها إلا واحدة زيي
هامتها مرفوعة عفيفة وأبيه
مش قدرة ولاغرور بجمال
ولا سطوة وعز وكتر مال
بس العبارة فيا اني مصرية
ليست هناك تعليقات:
إرسال تعليق